პროექტის ძირითად მიზანს წარმოადგენს საქართველოს მოსწავლე-ახალგაზრდობისთვის დასავლური და ევროპული კულტურის, ფასეულობებისა და ტრადიციების შესახებ ინფორმაციის მიწოდება ამ კულტურის წარმომადგენლებთან უშუალო ურთიერთობის გზით. ეს მათ მომავალში დაეხმარებათ მეტი წარმატების მიღწევაში, სამშობლოს ფარგლებს გარეთ, თუ საქართველოში მოღვაწეობისას. ამ მნიშვნელოვანი და გრძელვადიანი მიზნის მისაღწევად, საქართველოს განათლებისა და მეცნიერების სამინისტრომ, საერთაშორისო დონორების ხელშეწყობით, 1000 მოხალისე უკვე ჩამოიყვანა 2010-2011 სასწავლო წელს, რაც მომავალი სასწავლო წლებისთვისაც იგეგმება. თანამედროვე ტექნოლოგიების დახმარებით, ინგლისური ენის შესწავლის მრავალი ხერხი არსებობს. მიუხედავად იმისა, რომ ამ ტექნოლოგიების უპირატესობებს ვაღიარებთ და მათი პრაქტიკაში დანერგვისკენ მივისწრაფვით, მიგვაჩნია, რომ ადამიანური ფაქტორი და პირადი კონტაქტი შეუცვლელი რესურსია, რადგან ამ ფორმით სასწავლო გარემოს გამრავალფეროვნება გაცილებით ეფექტურია, ვიდრე კომუნიკაციის სხვა საშუალებებით.